Como unha das novidades desta tempada, Trópico de Grelos ideou un formato no que se combinan a esencia dos espectáculos de rúa coa dos Obradoiros, xurdindo este proxecto integral que pretende deixar a súa pegada nas xentes, implicando nunha maior medida ás persoas participantes.

Os Concertos Didácticos están estruturados en tres partes. Unha primeira mostra musical, na que participan tódolos integrantes de Trópico de Grelos, encárgase de abrir a xornada, con dúas finalidades perfectamente definidas. En primeiro lugar atraer á xente coa forza de convocatoria propia da percusión e, por outra banda, transmitirlle aos futuros participantes, as primeiras e máis básicas nocións do que despois eles mesmos van facer.

En segundo lugar chega a parte didáctica da actividade, invitando á xente do público a tocar con nós, sobre un ritmo que xa estará funcionando por si mesmo. Ao mesmo tempo, a persoa encargada da dirección integrará certos contidos relacionados coa historia e contexto do ritmo a interpretar.

Por último, a actividade rematará cun concerto que será o punto culminante desta actividade de máis de dúas horas de duración.